“መን እሞ እዩ ናባይ ኪቐርብ ኢሉስ ንልቡ ትሕጃ ዝህብ” ይብል እግዚኣብሄር። ኤር 30፥24

ልብኻ ናበይ ገጹ ይስሕበካ?

• ናብ ኣምላኽ ዝድርኽ ልቢ ዶ?
  • ልበይ ኣብ ክንዳኻ ዀይኑ፣ ንገጸይ ድለይዎ ይብለኒ ኣሎ። ዎ እግዚኣብሄር፣ ንገጽካ እደልዮ እኔኹ።
• ቃሉ ዝዓቖረ ልቢ ዶ?
  • ንኣኻ ምእንቲ ኸይብድልሲ፣ ንቓልካ ኣብ ልበይ ዐቘርክዎ።
• ናብ ስስዔ ገንዘብ ዘይዘበለ ልቢ ዶ?
  • ንልበይ ናብ ምስክራትካ እምበር፣ ናብ ስስዔ ገንዘብ ኣይተዝብሎ።
• ቃል ኣምላኽ ርስቱ ዝኾነ ልቢ ዶ?
  • ምስክራትካ ሓጐስ ልበይ እዩ እሞ፣ ንዘለአለም ርስተይ ገበርክዎ።
• ንቃሉ ክእዘዝ ዝደነነ ልቢ ዶ?
  • ስርዓታትካ ንሓዋሩ ኽሳዕ መወዳእታ ኽገብር፣ ልበይ ኣድነንኩ።
• ዘይዕበ ልቢ ዶ?
  • ዎ እግዚኣብሄር፣ ልበይ ኣይተዐበየን፣ ኣዒንተይ ከኣ ልዕል ኣይበላን፣ ኣብ ዓብይን ዘየስተውዕሎን ነገር ኣይመላለስን።
• ኣምላክ ዝምርምሮን ዝፍትኖን ልቢ ዶ?
  • ዎ ኣምላኽ፣ መርምረኒ፣ ልበይ ከኣ ፍለጥ፣ ፈትነኒ፣ ሓሳበይውን ፍለጥ።
• ብእግዚኣብሄር ጥራይ ዝሕጎስ ልቢ ዶ?
  • ካብቲ እቶም እኽሎምን ወይኖምን ምስ በዝሔ ዚሕጐስዎ ኣብሊጽካ ኣብ ልበይ ሓጐስ ኣንበርካ።
• ኣብ ምሕረት ኣምላኽ ዝውከል ልቢ ዶ?
  • ኣነ ግና ብምሕረትካ እውከል ኣሎኹ፣ ልበይ ብምድሓንካ ይሕጐስ ኣሎ።
• ኣብ እግዚኣብሄር ጥራይ ዝውከል ልቢ ዶ?
  • እግዚኣብሄርሲ ሓይለይን ዋልታይን እዩ፣ ልበይ ብእኡ ተወኪሉ፣ ኣነውን ተረዲኤ፣ ስለዚ ልበይ ይፍሳህ ኣሎ፣ ብመዝሙረይ ድማ ክውድሶ እየ።
• ቃል ኣምላኽ ኣብ ውሽጡ ዝኾነ ልቢ ዶ?
  • ሽዑ፣ እኔኹ መጻእኩ፣ ኣብቲ ጥቕሉል መጽሓፍ ስለይ ተጽሒፉ ኣሎ። ኣምላኸየ፣ ፍቓድካ ንምግባር ባህጊ ኣሎኒ፣ ሕግኻውን ኣብ ውሽጢ ልበይ እዩ፣ በልኩ።
• ጽድቂ ኣምላኽ ዘይሓብእ ልቢ ዶ?
  • ንጽድቅኻ ኣብ ውሽጢ ልበይ ኣይሐባእክዎን፣ እሙን ምዃንካን ምድሓንካን ነገርኩ፣ ሳህልኻን ሓቅኻን ነታ ዓባይ ማሕበር ኣይሓባእኩን።
• ካብ ውሽጡ ንኣምላኽ ጽቡቅ ዝግንፍል ልቢ ዶ
  • ካብ ልበይ ጽቡቕ ነገር ይግንፍል፣ ድርሳናተይ ንንጉስ እዩ፣ እብል፣ ልሳነይ ከም ብርዒ ቕልጡፍ ጸሓፊ እያ።
• ክዝምርን ከመስግንን ዘንቀደ ልቢ ዶ?
  • ልበይ ኣንቂዱ፣ ዎ ኣምላኽ፣ ልበይ ኣንቂዱ፣ ክዝምርን ከመስግንን፣ እየ።
• ኣብ ኣምላኽ ዘዕቑብ ልቢ ዶ?
  • ንስኻ መዕቈብየይ፣ ካብ ገጽ ጸላኢ ጽኑዕ ግምቢ ኢኻ እሞ፣ ልበይ እንተ ተሐለለ፣ ካብ ወሰን ምድሪ ኣባኻ ኸእዊ እየ። ናብቲ ኻባይ ልዕል ዝበለ ኸውሒ ምርሓኒ።
• እኩይ ዘይህቅን ልቢ ዶ?
  • ኣብ ልበይ እኩይ ሀቂነ እንተ ዝኸውን፣ እግዚኣብሄር ኣይምሰምዓንን ነይሩ።
• ንኣምላኽ ዝፈርሕ ልቢ ዶ?
  • ዎ እግዚኣብሄር፣ ብሓቅኻ ምእንቲ ኽመላለስ፣ መገድኻ ምሀረኒ፣ ስምካ ኽፈርህሲ፣  ልበይ ኣዳልዎ።
• ምጽንናዕ ኣምላኽ ዝዝክር ልቢ ዶ?
  • ጓሂ ልበይ አብ ውሽጠይ ምስ በዝሔ፣ ምጽንናዕካ ንነፍሰይ ኣሐጐሳ።
• ብፍጽምና ዝመላለስ ልቢ ዶ?
  • አብ ውሽጢ ቤተይ ብፍጹም ልበይ እመላለስ ኣሎኹ።

ናተይ ጸሎት እዚ እዩ። ናትካ/ናትኪ ‘ኸ?

ብሓውና ሳሙኤል ኣብርሃ