ኣብ ደገኻ ዝረአ ድኻም እንተሃልዩ ኣብ ውሽጥኻ ዝመንጨወ ኣብቲ ኣብ ውሽጥኻ ዘሎ መዝገብ ዝመንጨወ ምኻኑ ክትዝንግዕ ኣይግባእን። ነቲ ንገብሮ ዘሎና ነገር ኣብ ውሽጥና ዘሎ ድጉል ናይ ዝሙት ፈተነ ነጸብራቕ ይኸውን ኣሎ፡ ውሽጥና ካብ ምምሉኡ ዝተላዕለ ይጎስዕ ኣሎ። ስለዚ ከኣ ኣብ ደጌና ናይ ዝሙት ነጸብራቕ እናዓዘዘ እና ዓዘዘ ኣብ ምቕላዕ ንኸብር ክንዲ ኣብ ምኽዳን።
ብዕለት 09/03/2003

እግዚኣብሄር ምስዘልዕል፡ ………………እግዚኣብሄር ምሕረቱ ምስዘብዝሕ፡………………………
– እግዚኣብሄር ምሕረቱ ምስዘብዝሕ፡ ክልተ ዘይራኸብ ጫፍ ይራኸብ፡
– ኣብ ጸቢብ ደረት ደቂ ሓዉቦ ተሳንዮም ይቕመጡ፥ ምሕረቱ ከልዕል እንከሎ ኸኣ ምድሪ ብጎልጎሉ ይጸቦም፡
– እግዚብሄር ምሕረቱ ዘዕዘዘላ ነፍሲ እንዳተነጥቀት እንዳዓበየት ትኸይድ፡
– እግዚኣብሄር ምሕረቱ ምስ ዘብዝሕ ክልተ ዘይሳነዩ ሰብ ሓዳር ብፍቕሪ ይነብሩ፥
– ኣብ ሃገርና ንደልዮ ሰላም፡ በረኸት ብምሕረት እግዚኣብሄር ጥራይ ኢና ንቕበሎ።

ዕንበባ ጽጌረዳ ትርኢታ እተብህግ ግናኸ ኣብ ጉንዳ እሾኽ ዘለዋ ንግስቲ ዕንበባታት እያ። ኣብዚ ምድሪ እዚ ክሳዕ ዘሎና፣ ህይወት ከምኡ ኪትከውን እያ። ናይ ገሌና መንፈሳዊ የዒንቲ ዕጽው ካብ ምዃኑ ዝተላዕለ ኣብቲ እሾክ ንዘሎ ጽቡቕ ነገር ምርኣይ ንስእን እሞ፣ ንህይወት ብምምራር ነሕልፋ። ኣምላኽ፣ መንፈሳዊ የዒንትና ኪኸፍት እሞ፣ ኣብቲ ክፉእ ዝመስል ነገር ጹብቕ ክንርኢ እይዩ ዚደሊ። “ኣብ ሕግኻ ተኣምራት ክርእስ ኣዒይንተይ ክፈተለይ” ኢሉ ዘማራይ ዳዊት። ስለዚ ኣብ ክፉእ ዝመስል ነገር፣ ተኣምራት እግዚኣብሄር እናስተማቐርና፣ ንህይወትና ብምስጋና ኪንመልኣ ኣምላኽ ንህይወትና ይዛረብ። እቲ ምስጋና ነቲ እሾኽ ናብ ዘየለ ከምጽኦ’ውን ሓይሊ ኣለዎ።
14/04/2002

ብዓይኒ እግዚኣብሄር ምጥማት
ንዝገጥመና ኵነታት ወይ ብዛዕባ ዝዀነ ጉዳይ ክንውስን ከሎና ብዓይኒ እግዚኣብሄር ክንርእዮ ብጣዕሚ እዩ ዘድልየና። ኵነታትን፡ ውሳነታትን ብዓይንናን ብዓይኒ እግዚኣብሄርን ኪርኣዩ ከለዉ፡ ከም ኣብ ህይወት ጴጥሮስ ኣብ ልዕሊ ማይ ናይ ምኻድን ምጥሓልን፡ ከም ኣብ ህይወት ኤልሳእን ገሓዝን ድማ ናይ ምትባዕን ናይ ምፍራህን፡ ኣብ ውሳነታት ናይ ሎጥን ኣብራምን ድማ ናብ ሶዶም ከም ምጽጋዕን ምንዳድን ናብቲ እግዚኣብሄር ዝመረጸልካ ከም ምኻድን እዩ ፍልልዮም። ብዘይ እዚ፡ ሎሚ ንዅነታትና ኪንሰግሮ ኢና ኢልካ ዝሕሰብውን ኣይኰነን። ስለዚ ከም ኣረኣእያ እግዚኣብሄር ኪንጥምት ሎሚ ኣምላኽ ይዛረበና ኣሎ።

ኣብ ብሉይ ኪዳን ናብ እግዚኣብሄር ምቕራብ ኣዝዩ ኣጸጋሚ እዩ ነይሩ። ኣብ ሓድሽ ኪዳን ግን ብምኽንያት እቲ ጐይታናን መድሓኒናን እየሱስ ክርስቶስ ዝኸፈሎ ናይ መስቀል ዋጋ፣ ቤት መቕደስ ኣምላኽ ንምዃን በቒዕና ኢና፣ ግናኸ እዛ ቤት መቕደስ እዚእ ቅድስቲ እያ። ቃል ኣምላኽ ድማ ነቲ ንርእሱ ካብቲ ዝቃጸዎ ሓጢኣት ሓልዩ ብቕድስና ዚመላለስ ሰብ ህያው እምኒ ይብሎ። እቲ ዝሞተልና ጐይታ ባዕሉ ሕሩይን ክቡርን ህያው እምኒ መኣዝን እዩ። ንሕና ድማ ክንቅደስ ክንመርጽን ልብና ክንከፍትን ከሎና ከምኡ ህያዋን ኣእማን ኢና ንኸውን። ስለዚ ድማ ንቕዱስ ክህነት ዝኸውን መንፈሳዊ ቤት ንህነጽ። ነዚ ቤት መቕደስ ኣምላኽ ዝኾነ ስጋኡ ዘማሰነ ግን ኣምላኽ ባዕሉ ከም ዘማስኖ ብቓሉ ተዛሪቡና ኣሎ። ርእስና ብጽድቂ ክንሕሉ ኣምላኽ ይጽውዓና ኣሎ።
ብ ዶ/ር ተኽልኣብ መንግስትኣብ ኣብ ቀጽሪ መካነ ሂወት መድሃኔ ኣለም ቤት ክርስትያን