ብዓይኒ እግዚኣብሄር ምጥማት
ንዝገጥመና ኵነታት ወይ ብዛዕባ ዝዀነ ጉዳይ ክንውስን ከሎና ብዓይኒ እግዚኣብሄር ክንርእዮ ብጣዕሚ እዩ ዘድልየና። ኵነታትን፡ ውሳነታትን ብዓይንናን ብዓይኒ እግዚኣብሄርን ኪርኣዩ ከለዉ፡ ከም ኣብ ህይወት ጴጥሮስ ኣብ ልዕሊ ማይ ናይ ምኻድን ምጥሓልን፡ ከም ኣብ ህይወት ኤልሳእን ገሓዝን ድማ ናይ ምትባዕን ናይ ምፍራህን፡ ኣብ ውሳነታት ናይ ሎጥን ኣብራምን ድማ ናብ ሶዶም ከም ምጽጋዕን ምንዳድን ናብቲ እግዚኣብሄር ዝመረጸልካ ከም ምኻድን እዩ ፍልልዮም። ብዘይ እዚ፡ ሎሚ ንዅነታትና ኪንሰግሮ ኢና ኢልካ ዝሕሰብውን ኣይኰነን። ስለዚ ከም ኣረኣእያ እግዚኣብሄር ኪንጥምት ሎሚ ኣምላኽ ይዛረበና ኣሎ።

ኣብ ብሉይ ኪዳን ናብ እግዚኣብሄር ምቕራብ ኣዝዩ ኣጸጋሚ እዩ ነይሩ። ኣብ ሓድሽ ኪዳን ግን ብምኽንያት እቲ ጐይታናን መድሓኒናን እየሱስ ክርስቶስ ዝኸፈሎ ናይ መስቀል ዋጋ፣ ቤት መቕደስ ኣምላኽ ንምዃን በቒዕና ኢና፣ ግናኸ እዛ ቤት መቕደስ እዚእ ቅድስቲ እያ። ቃል ኣምላኽ ድማ ነቲ ንርእሱ ካብቲ ዝቃጸዎ ሓጢኣት ሓልዩ ብቕድስና ዚመላለስ ሰብ ህያው እምኒ ይብሎ። እቲ ዝሞተልና ጐይታ ባዕሉ ሕሩይን ክቡርን ህያው እምኒ መኣዝን እዩ። ንሕና ድማ ክንቅደስ ክንመርጽን ልብና ክንከፍትን ከሎና ከምኡ ህያዋን ኣእማን ኢና ንኸውን። ስለዚ ድማ ንቕዱስ ክህነት ዝኸውን መንፈሳዊ ቤት ንህነጽ። ነዚ ቤት መቕደስ ኣምላኽ ዝኾነ ስጋኡ ዘማሰነ ግን ኣምላኽ ባዕሉ ከም ዘማስኖ ብቓሉ ተዛሪቡና ኣሎ። ርእስና ብጽድቂ ክንሕሉ ኣምላኽ ይጽውዓና ኣሎ።
ብ ዶ/ር ተኽልኣብ መንግስትኣብ ኣብ ቀጽሪ መካነ ሂወት መድሃኔ ኣለም ቤት ክርስትያን

ቤተ ክርስቲያን ንክርስቶስ ሰብነቱ እያ። ሎሚ ንሱ ኣብ ሰማያት ስለ ዘሎ ንሳ ድማ ወካሊቱ እያ። እቲ ንዓለም ዘድልያ ነገር ኵሉ ድማ ኣብ ክርስቶስ እዩ ተሰዊሩ ዘሎ። እዚ ነገር እዚ ኣብ ቤተ ክርስቲያን ኪህሉ ይግባእ። ቤተ ክርስቲያን ስርዓትን ቅርጽን ኣካይዳን ኣለዋ። ርእሲ ናይ ቤተ ክርስቲያን ድማ ክርስቶስ እዩ። ኣብ ርእሲ ዓይኒ ኣሎ፡ ኣብ ርእሲ እዝኒ ኣሎ፡ ኣብ ርእሲ ድማ ኣእምሮ ኣሎ። ቤተ ክርስቲያን ባህርያትውን ኣለዋ። ሓደ ካብዚ ድማ ፍቕሪ እዩ። ኣብ ንሓድሕድና ፍቕሪ ኪህሉ ብግዲ እዩ፡፡ ካልኣይ ባህሪኣ ድማ ሰላምን ስምምዕን እዩ። ሳልሳይ ባህሪ ናይ ቤተ ክርስቲያን ድማ ምጽንናዕን ምምዕዓድን እዩ። 20-06-2003

ሃዋርያ ጳውሎስ፣ ብእምነት እንተ ኣሊኹም ርእስኹም ፈትኑ፣ ርእስኹምውን መርምሩ ኢሉና ኣሎ። መሊሱ እቶም ናትና ነቲ ብግዲ ዜድሊ ነገር ኪመሃሩ ከምዘድሊ ተዛሪቡ ኣሎ። እዚ ከኣ ብክርስቶስ ዚርከብ ፍረ ጽድቂ እዩ። ሓደ ካብኡ ድማ እምነት እዩ። ስለዚ ሎሚ ብቓል ኣምላኽ ሓቀኛ እምነት እንተ ኣሎና ርእስና ኪንፍትሽ ይግብኣና። ሓቀኛ እምነት ግብሪ ኣለዎ። ስሑት እምነት ግብሪ የብሉን። ሰባት ክንዲ ንእግዚኣብሄር ንገንዘብ፣ ንናይ ሓሶት ትምህርትን ካልእን ኪኣምኑ ይርኣዩ እዮም። እዛ ዘላትና ንእሽቶ እምነት ምእንቲ ክትዓብየልና ኣብ ቅድሚ ኣምላኽ ጸሎት እነዘውትር ሰባት ንኹን። ንኣምላኽ እምነት ወስኸና ንበሎ።
ብ ቀሺ ገብረመጽህን ገብረጊዮርጊስ ዕለት 24/10/2004 ኣብ ቀጽሪ መካነ ሂወት መድሃኔም ቤትክርስትያን

ክርስትና ኣብ ዓለም ዝንበር ናብራ እዩ። ንመንፈሳዊ ህይወት እነብሮ ኣለኹ ኪንብል ንኽእል ድማ፡ ንኣምላኽ ኣብ ኵሉ መዳይ ናይ ህይወትና፡ ኩሉ ሳዕ ኪንኣምኖ እንተ ኽኢልና እዩ። ንሰባት ብዛዕባ ኣምላኽ ክንነግሮም ከሎና ዘይኣምኑና፡ ዋዛ ስለዝመስሎምን፡ ኣምላኽ ክሳዕ ክንድኡ ዓቢይ እዩ ኢሎም ስለ ዘይሓስቡን እዩ። ኣመንቲ ንኣምላኽ ዘይኣምኑሉ ምኽንያት ድማ ኣምላኽ ኣብ ልዕሊኦም ዘለዎ ኣጠማምታ ካብ ዘይምፍላጥ እዩ ዝብገስ። ኣምላኽ ዝሓልየልና፡ ጸጉሪ ርእስና ዝፈቐደ፡ ካብ ማሕጸን ጀሚሩ ዝድግፈካ፡ ዕርዲን ከውሕን ምኳኑ እንተበጺሒናዮ ግና፡ ኣብ ኵሉ ኵነታትና ኪንኣምኖ ሓይሊ ንረክብ ኢና። ኣምላኽ ፍቕሪ እዩ፡ ኣምላኽ ኣጸቢቑ የፍቅረናን ይሓልየልናን እዩ እሞ ክንኣምኖ ይጽበየና እዩ። ኣምላኽ ይደግፈና።