ኣብ ትንሳኤ ምውታን እቲ ዝዓበይ ነገር ምስ ኣምላኽ ምዃን እዩ። እቲ ምስ ኣምላኽ ብምዃንና ዘምጽኣልና ተወሳኺ ነገር ከይወስኽናሉ እዃ እቲ ምስ ኣምላኽ ምዃን ዝብል ጥራይ ኣዝዩ ዓቢ ነገር እዩ።…
…. ኣምላኽ እቲ ንዕኡን ንሰባትን ናይ ዘገልገልናዮ ዓስቢ ክህበና እዩ። ዓስቢ ናይቲ ሰባት ኣብ ልዕሌና ዝገበርዎ እሞ ዝተዓገስናዮ ነገርውን ኣምላኽ ክኽሕሰና እዩ። ሽዑ ኣኽሊል ህይወትን፡ ኣኽሊል ክብርን ክንወርስ ኢና። ምስናይ እዚ ግና እቲ ጐይታ ምእንታና ዝጸለዮ ዝዓበየ ጸሎት፡ ንሕና ምስኡ ምእንቲ ክንከውን እዩ። ጐይታ ይደግፍ።

እግዚኣብሄር ንግብርና፣ ቃላትናን ሓሳብናን ከም ዝፈርድ ኣብቲ ዝሓለፈ ክፋል ትምህርትና ርኢና ኔርና። ግብሪ ኢልና ክንሓስብ ከሎና ግና፣ እቲ ሓጥእ ኣእምሮና ሓጢኣት ንዝብሎም ግብርታት ዘይኰነስ፣ ክርስቶስ ኣብ ቦታይ እንታይ ምገበረ ኢልና ክንሓስብ ከድልየና እዩ። ድሕሪ ፍርዲ ሰባት ገሊኦም ናብ ናይ ዘለኣለም ዕረፍቲ ይኣትዉ፣ ገሊኦም ድማ ናብ ናይ ዘለኣለም ሞትን ምሕርቃም ኣስናንን ይኣትዉ። መንግስቲ ኣምላኽ፣ መዝገብና ዝዕቈረላ፣ መጽሓፍ ህይወት ዘለዋ፣ ማሕደር ቅዱሳን ዝዀነት፣ ኢየሱስ ዘለዋን ቦታ እያ። ንሳ ብኢድ ሰብ ዘይተገብረት፣ ድሑናት ጥራይ ዚርከቡላ ቦታ እያ። ኣብኣ፣ ሞት፣ ሓዘን፣ ብኽያት፣ ጻዕሪ፣ መርገም፣ ለይትን ባሕርን የሎን። ኣብኡ ሓጐስን ክብርን ኣሎ።

ብዕለት 18/10/2003 ኣብ ቀጽሪ መካነ ህይወት መድሃኔ ኣለም ቤት ክርስትያን ዝተዋህበ ተኽታታሊ ትምህርቲ

ትንሳኤ ምውታን ዝኸውን ምእንቲ ዘለኣለማውነት እዩ – ሰብ ንዘለኣለም ናብ ሓጐስ ጐይታኡ ወይ ንዘለኣለም ናብ ስቓይ ምእንቲ ኪኣቱ። ቅድሚ ናብ ዘለኣለማውነት ምእታውና ግና ጐይታ ኪምለስ ከሎ ሓደ ዝኸውን ፍጻሜ ኣሎ። ንሱ ድማ ፍርዲ እዩ። ቅድሚ እዚ ናይ መወዳእታ ፍርዲ’ውን እንተዀነ ሰባት ይፍረዱ እዮም ዘለዉ። ነዚ ነገር እዚ ንምርዳእ ንዛንታ ናይ ኣልኣዛርን እቲ ሃብታም ሰብኣይን ክንርኢ ንኽእል ኢና። ፍርድና ብመጠን እቲ ካብ ኣምላኽ ዝተቐበልናዮ ሓለፋታት ምዃኑ ድማ ኣይንረስዕ። ስለዚ ንትንሳኤ (ንህይወት) ዝኸውን ናብራ ኪንነብር ኣምላኽ ይዛረበና ኣሎ።

ኣብ ቀጽሪ መካነ ሂወት መድሃኔ ኣለም ቤት ክርስትያን ብዕለት ብ ዶ/ር ተኽለኣብ መንግስትኣብ

ትንሳኤ ተኣምራታዊ ፍጻሜ እዩ። ሽዑ ድሩት ህልውናና ናብ ዘይድሩት ህልውና ኪመጽእ እዩ። “እቲ ዝርአ ንጊዜኡ እዩ፣ እቲ ዘይርአ ግና ዘለኣለማዊ እዩ” ከም ዝተጻሕፈ ድማ ካብዚ ሎሚ ብዓይንና እንርእዮ ዘሎና ሓላፊ ነገር ናብቲ ብዓይንና ርኢናዮ ዘይንፈልጥ ዘለኣለማዊ ነገር ክንሓልፍ ኢና። ካብዚ ብሓጢኣት እንፍተነሉ ዓለም ናብቲ ብፍጹም ጽድቂ እንነብረሉ ሰማያት ክንሳገር ኢና። ትንሳኤ፣ ጐይታ በቲ ንኹሉ ዝመልከሉ ሓይሉ ነቲ ናብ መሬት ዝተለወጠ ስጋና ዝእክበሉ፣ ኩሉ ተግባር፣ ቃልን ሓሳባትን ሰባት ናብ ፍርዲ ዝመጸሉ፣ እቶም ክዳውንቶም ብደም እቲ ገንሸል ዘጻዕደዉ ፍጽምና ዝለብስሉ፣ ሰብ ኣብ ልዕሊ ሞትን ህይወትን ዝገዝኣሉ ፍጻሜ እዩ። ኣብቲ ፍርዲ ስጋ ምስ ነፍስን መንፈስን ብሓንሳብ ክፍረዳ እየን። ኣብ ጊዜ ትንሳኤ ዝወሃብ ፍርዲ ከከም ግብርኻን እምነትካን እምበር ኣብ ዓሌት፣ ማሕበራዊ ደርቢ፣ ማዕርግ፣ ደረጃ ትምህርቲ ወዘተ ዝምርኮስ ኣይኰነን።

ኣብ ቀጽሪ መካነ ሂወት መድሃኔ ኣለም ቤት ክርስትያን ብዕለት 10-11-2003 ብ ዶ/ር ተኽለኣብ መንግስትኣብ

ቅድሚ ብዛዕባ ትንሳኤ ምዉታን ምዝራብና፣ ብዛዕባ ሞት ክንዛረብ የድልየና። ንሞት ኣብ ኣርባዕተ ክንከፍሎ ንኽእል ኢና። ስጋዊ ሞት፣ ስነ-ምግባራዊ ሞት፣ መንፈሳዊ ሞትን ዘለኣለማዊ ሞትን ድማ ይበሃሉ። ንሓደ ናይ ብሓቂ ክርስቲያን ዝዀነ፣ ስጋዊ ሞት ድቃስን ናብ ክብሪ ኣምላኽ ዘእቱን መሰጋገሪ ስለዝዀነ ኪፈርሆ ኣይግባእን እዩ። ስነ-ምግባራዊ ሞት ኣዝዩ ሓደገኛ እዩ፣ ምዉት ግብርን፣ ብዘይጽቡቕ ሃቐናን ሰናይ ግብሪ ምግባርን እዚ ስነ-ምግባራዊ ሞት እዩ። ንድምጺ ኣምላኽ ክሳዕ መወዳእታ እንተ ተጻሪርናዮ ድማ መንፈሳዊ ሞት (ካብ ኣምላኽ ምፍላይ) ይስዕብ። ኣብ ከምዚ ዝበለ ኵነታት እንከሎ ብስጋ እንድሕሪ ሞይትና እዚ ንሰብ ናብ ዘለኣለማዊ ሞት ይመርሖ። ኣምላኽ ካብዚ ይሰውረና።